يا ترى يعني إيه إن مصر تنتج 640 ألف أوقية دهب وفضة، والمبيعات توصل ل 1.54 مليار دولار، يعني ايه الأرقام دي، وإزاي ممكن تغير شكل الاقتصاد لو اتوظفت صح؟
في الساعات الأخيرة، وزير البترول الثروة المعدنية المهندس كريم بدوي، أعلن في منتدى مصر للتعدين، إن إنتاج مصر من الدهب والفضة خلال سنة واحدة بس، وصل ل 640 ألف أوقية، وده بزيادة 14% عن السنة اللي فاتت.
بس المفاجأة الأكبر، ان قيمة المبيعات وصلت ل 1.54 مليار دولار، يعني زيادة 57% عن السنة اللي فاتت، ظيب يعني إيه الكلام ده؟
يعني باختصار، في شغل بيحصل تحت الأرض، وفلوس طالعة لفوق، والزيادة دي مش مجرد أرقام، دي دليل إن في تطوير حقيقي في قطاع التعدين، وان السياسات اللي الدولة ماشية بيها بدأت تدي ثمارها.
طيب ده يفرق معانا في إيه؟
أول حاجة، الفلوس دي داخلة دولارات صافية للاقتصاد، وده بيساعد في تقليل الضغط على العملة، وتحسين احتياطي النقد الأجنبي.
تاني حاجة، كل ما الإنتاج يزيد، كل ما مساهمة قطاع التعدين تكبر في الناتج المحلي وده معناه إن عندنا مصدر دخل مستدام مش مرتبط بالسياحة أو الاستيراد، وتالت حاجة هي خلق فرص عمل، سواء في المواقع الإنتاجية أو في الخدمات المرتبطة بالمناجم.
والنتيجة طبعا، زي ما الوزير قال ان اللي حصل ده نتيجة سياسات واضحة لتطوير قطاع التعدين، منها تعديل القوانين، وتسهيل دخول الشركات الأجنبية، وكمان إطلاق مشروع المسح الجوي الشامل، اللي هيحدد فرص تعدين جديدة في كل أنحاء مصر.
واحنل كمصريين هنستفيد وكمان الدولة والمستثمرين والناس اللي شغالة في القطاع، لأن لما يكون عندك إنتاج دهب وفضة بالمستوى ده،
ده مش بس بيدخل فلوس، لأ ده كمان بيشجع شركات تانية تدخل السوق، ويخلي مصر وجهة معدنية واعدة في الشرق الأوسط وأفريقيا.
اما بقر اللي جاي فهو أكبر لأن الدولة مش ناوية توقف، في خطة لافتتاح مدرسة جديدة للتعليم التعديني في مرسى علم، عشان نجهز شباب وفنيين يشتغلوا في المجال ده باحتراف، يعني مش بس بنستخرج كنوزنا، وإحنا كمان بنبني صناعة كاملة حوالين الدهب والمعادن.
والخلاصة، هي ان اللي حصل مش رقم في مؤتمر، دي بداية حقيقية لإننا نستفيد من ثرواتنا الطبيعية بشكل اقتصادي ذكي، والأهم بشكل مستدام، يعني لو استمرينا على نفس الطريق فمصر ممكن تبقى لاعب أساسي في سوق الذهب العالمي، ومصدر دخل كبير من غير ما نستلف ولا نستورد، يعني رزقنا فعلا تحت رجلينا.
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
