محمد دياب يوضح حقيقة العرض المحدود

أوضح السيناريست والمخرج محمد دياب، عبر صفحته الشخصية على موقع التواصل الاجتماعي فيسبوك، حقيقة مصطلح العرض المحدود سئ السمعة.

وكتب دياب قائلا ": شهر سبتمبر من كل عام هو توقيت اختيار دول العالم للأفلام اللي هتمثلها في مسابقه الأوسكار.. بصفتي عضو في أكاديميه الاوسكار الأمريكيه منذ ٨ سنوات فعندي بعض الخبره في الموضوع ده.

وأضاف : "اولا لجنه اختيار الفيلم المشارك في الاوسكار بتتكون بعد ترشيح نقابه السينمائيين لأسماء بارزه سينمائياً و سنوياً بترد اكاديميه الاوسكار الأمريكيه بإختيارات من الأسماء دي.. الافلام اللي مسموح لها تشارك هي الافلام اللي اتعرضت تجارياً في السنه اللي سبقت ٣١سبتمبر لكل سنه.  علي مدار السنه الافلام اللي لمعت في مهرجانات مهمه و خدت جوايز بتاخد دفعه و زخم بتاع نجاحها القريب و بتحاول انها تبقي اختيار بلدها للأوسكار.

وتابع : "كتير من الافلام دي بتكون لسه متعرضتش بشكل تجاري في بلادها، و بيبقي في اختيار من اتنين تأجيل ترشيح الفيلم للسنه اللي بعدها و خساره الزخم اللي عمله نجاحها او انها تعمل عرض محدود لإستيفاء شروط الترشح.  طبعاً الفيلم اللي بيختار يترشح السنه اللي بعدها بيبقي اتنسي تماماً عند المصوتين و فرصته تقريباً بتتلاشي.

واستكمل حديثه قائلًا : "أيه هي شروط العرض اللي الإوسكار حاطها؟ إن الفيلم يتعرض لمده اسبوع تجارياً علي الأقل في سينما واحده.. مثال الفيلم البرازيلي I am still here الحائز علي اوسكار أحسن فيلم العام الماضي، تم عرضه عرض محدود في سبتمبر في البرازيل ثم تم عرضه عرض عام في فبراير.

وأضاف: "القصه دي بتتكرر كل سنه بالذات للأفلام اللي بتروح مهرجان فينيسيا اللي هو في سبتمبر و آخر معاد لتوقيت مسابقه الأوسكار هو ٣١ من نفس الشهر.. و ده بيخلي العرض التجاري في احوال كتير مستحيل، السنه دي علي الاقل في سبع افلام من فينيسيا تم اعلان أختيارها لتمثيل بلادها في الاوسكار  و غالبيتهم اختاروا انهم يعملوا عرض محدود، يتبعه العرض العام لاحقاً.

وتابع : "الوضع ده نفسه حصل مع فيلم (عيد ميلاد سعيد) السنه دي و فيلم (الشيخ جاكسون) اللي كان اختيار مصر للأوسكار سنه ٢٠١٧، و اللي تم عرضه عرض محدود في سبتمبر تبعه عرض عام لاحقاً، و ساعتها حصل لغط زي اللي حصل السنه دي.

واضاف : "العرض المحدود دائماً بيبقي دعايته بسيطه و هدفه استيفاء الشروط عشان ميأثرش بالسلب علي عرضه التجاري اللاحق لو الجمهور لو اعتقد ان الفيلم نزل و اتشال قبل كده.. المعلومات دي ممكن تكون مش متاحه للجميع فده بيسبب صوره سلبيه سيئه السمعه عن العروض المحدوده و بيخلي ناس تفتكر انها تلاعب. المدهش ان مصر هي البلد الوحيده في العالم اللي عندها عدائيه تجاه العرض المحدود، مع انه لجنه الأوسكار الأمريكيه بتتعمد التسهيل، فمثلاً فيه قرار جديد ان العرض المحدود حتي مش لازم يبقي في البلد الأم.  

وتابع : "أهميه اننا نشيل الوصم اللي على العرض المحدود، ان متضعش فرص على أفلام مستقبليه.. لأن تهمه التلاعب الغير حقيقيه قانونياً و اخلاقياً، بتضغط على لجان الأختيار انها تتفادي اختيار الافلام دي عشان هي نفسها ميطالهاش اتهامات. 

واضاف : "بفكر الكل بالنقطه الأهم و طهي اجماع لجنه الاختيار المحترمه على ان فيلم (عيد ميلاد سعيد) هو اختيار مصر للأوسكار بناء علي تميزه الفني.. الفيلم فيلم افتتاح مهرجان الجونه وحصل علي ٣ جوائز في مهرجان ترايبكا، احسن فيلم، ومخرج وسيناريو الفيلم أيضاً شارك في انتاجه الممثل الحاصل علي الأوسكار جيمي فوكس في سابقه محصلتش لفيلم مصري.

واختتم حديثه قائلًا: "اخيراً أشكر نقابه المهن السينمائيه ولجنه الاختيار المكونه من فنانين و نقاد وسينمائين اللي اختاروا الفيلم اللي حبوه رغم معرفتهم باللغط اللي ممكن يحصل.. وأكيد محتاجين الدعم من كل المصريين كما تدعم كل الدول اختيار لجانها.

تفاصيل الفيلم 

والفيلم يعبر عن مشكلة العصر و هي الطبقية و تأثيرها علي حياتنا كلنا."، الفيلم من تأليف محمد دياب وسارة جوهر، وإخراج سارة جوهر.وانتاج احمد الدسوقي- سكاي ليميت-  وشاركه  -  الإنتاج كل من احمد بدوي - فيلم سكوير- وأحمد عباس - ايمرسيف وبطولة كل من نيللي كريم و حنان مطاوع و شريف سلامة.

وكان العرض العالمي الأول للفيلم في المسابقة الرسمية لمهرجان تريبيكا في أمريكا، الفيلم سيتم عرضه في افتتاح النسخة الجديدة من مهرجان الجونة السينمائي
على أن يعرض تجاريا بشكل كامل بعدها في وقت سيتم تحديده قريبا.