مش هنحناج نستورد عربيات سكك حديدية تاني ولا هتكون جرارات القطارات صناعة أجنبية وكله هيكون محلي.. ياتري اية حكاية الكلام .. أمتي مصر هتصنع قطبان وعربيات وجرارات السكك الحديدية.. والفاتورة اللي هتوفر مصر هتوصل لكام.
في الوقت الحالي مصر بقي صوتها من دماغها وكل اللي هنحتاجه هنصنعه عندنا في مصر ومش هيكون استيراد تاني خصوصا في القطاعات الخدمية واللي وأخذه جزء كبير في فاتورة واردات مصر من الخارج، واحدة من الحاجات اللي مصر هتوقف استيرادها هيا صناعة قطارات السكك الحديدية، واللي هيا واحدة من عصب الحياة اليومية، واللي بدونها الدولة كلها تقف خصوصا أن ماسكة مصر من شرقها لغربها وبتخدم قطاع كبير جدا من الناس ده غير أنها المنفذ الوحيد والرئيسي لنقل عدد كبير من البضائع.
طيب إزاي مصر هتوقف استيراد عربيات القطارات والمهمات المتعلقة بيها من الخارج؟.
مصر بقي عندها خطة قوية بتهدف لتوطين صناعة عربيات القطارات والمحطات جوه مصر، والتصنيع المحلي مش هيكون علشان احتياجات السوق عندنا بس لا ده كمان في جزء كبير من الخطة معتمد علي التصدير للخارج.
وعلشان مصر توصل لهدفها وتوطن صناعة قطارات السكك الحديدية والمترو فاسسنا اول مجمع صناعي عملاق في شرق بورسعيد هتكون المرحلة الأولي منه لتصنيع عربيات القطار والمترو، والمرحلة التانية هندخل في تصنيع المونوريل والقطارات عالية السرعة والقطارات كهربائية خفيفة، والمرحلة الثالثة والأخيرة هتكون خاصة بتجديد العربيات القديمة، وده بالشركة مع واحدة من كبري الشركات العالمية في مجالات صناعة القطارات وهيا شركة هيونداي، وهتكون البداية بتصنيع 500 عربة قطار، و320 عربة مكيفة للخط الثاني والثالث من مترو القاهرة، ده غير خطة لتصنيع عربيات ترام السكة الحديد اللي هيكون في الاسكندرية.
مش بس كده لا ده كمان مصر وقعت شركات مع شركة تالجو واللي بتعد من أكبر الشركات العالمية،. الاتفاق بيتضمن تصنيع 500 عربة ركاب في المرحلة الأولي باستخدام تكنولوجيا التالجو، وكمان في تعاون مع شركة ألمانية فرنسية ومصانع في برج العرب عشان يصنعوا أنظمة إشارات ومكونات كهربائية ومصنع للوحدات المتحركة زي المترو والترام وقطارات السرعة العالية .
المرحلة الأولي من خطة توطين صناعة قطارات وعربيات السكك الحديدية بتستهدف زيادة المنتج المحلي في الإنتاج لـ 65%، لعربيات السكك الحديدية وبتستهدف وصولها لـ 40% في قطارات مترو الانفاق والتفكير دلوقتي أن التصنيع كله يكون في مراحله الاولي لتغطية السوق المحلي، وبعدها تيجي مرحلة التصدير للخارج.
الدولة رسمت خطة كبيرة جدا لتوطين الصناعة من عربيات وجرارات وإشارات وورش، ده غير أنها بتتضمن تطوير العنصر البشري بهدف تقليل ووقف الاعتماد على الاستيراد، ده طبعا بالتعاون مع كبريات الشركات العالمية بهدف نقل الخبرات الوصول للجودة المطلوبة في الإنتاج.
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
