السياحة في مصر مش شواطئ ولا آثار بس .. فيه سياحة تانية الحكومة بتراهن عليها الفترة الجاية ومتوقع تدخل للبلد سنويا أكتر من مليار ونص دولار.. فيا ترى ايه السياحة دي ؟ وازاى مصر هتستغلها لتوفير مورد دولاري جديد ؟
من سنين قريبة كان مجرد التفكير في إن السياحة الصحية ممكن تكون مصدر دخل أساسي لمصر أمر صعب.. لكن النهارده.. الحكومة المصرية حطت خطة طموحة جداً.. هدفها إن السياحة الصحية تجيب لمصر 1.7 مليار دولار في الخمس سنين اللي جاية.. وده جزء من استراتيجية أكبر بتستهدف جذب 30 مليون سائح في 2030.
طب إيه حكاية السياحة دي؟ وهل مصر عندها اللي يخليها مركز عالمي للعلاج؟
مصر عندها كنوز طبيعية محدش يعرف قيمتها.. عندنا أكتر من 1300 عين مائية علاجية.. زي العيون الكبريتية في سيناء.. والمناطق الاستشفائية في الواحات البحرية والوادي الجديد وواحة سيوة.. كل الأماكن دي ليها قدرة على علاج أمراض كتير.. زي الأمراض الجلدية وأمراض العظام.. ده كنز طبيعي مفيش منه كتير في العالم.
كمان.. فيه نوع تاني من السياحة دي.. وهو السياحة العلاجية.. ودي بتعتمد على المستشفيات والمراكز الطبية اللي بتوفر أحدث العلاجات والعمليات الجراحية.. مصر عندها بنية طبية قوية جداً.. وأطباء من أكفأ الكوادر في العالم.
السياحة دي مش زي السياحة العادية.. السائح العلاجي بيصرف أكتر بكتير.. متوسط إنفاقه ممكن يوصل لـ 200 دولار في الليلة الواحدة.. وده طبعاً ضعف إنفاق السائح العادي.. يعني لو قدرنا نجذب عدد قليل من السُياح دول.. هيدخلوا للبلد فلوس أكتر بكتير.
الخطة الحكومية بتشتغل على مرحلتين.. الأولى في تلات سنين.. بتستهدف إن السياحة العلاجية تكون 4% من إيرادات السياحة.. والمرحلة التانية في خمس سنين.. هتكون 7% من إيرادات القطاع كله.. ده بيوضح قد إيه الدولة بتراهن على القطاع ده.
الحكومة عملت مجلس وطني للسياحة الصحية.. وده دليل على إن الموضوع بجد.. كمان بيجهزوا دليل شامل بكل الضوابط والمعايير.. وهيطلقوا منصة إلكترونية بداية 2026.. كل ده عشان يسهلوا على المستثمرين.. ويضمنوا جودة الخدمة.
فيه تحديات طبعاً.. زي الحصول على التراخيص.. والجمارك على الأجهزة الطبية المستوردة.. بس المسؤولين بيحاولوا يحلوا المشاكل دي.. لإنهم عارفين إن السياحة دي هتوفر فرص عمل كبيرة للأطباء المصريين.. وهتحافظ على الكوادر الطبية من السفر للخارج.
الحاجة المؤكدة إن السياحة الصحية مش مجرد رفاهية.. دي استراتيجية اقتصادية واضحة.. بتستفيد من كنوز مصر الطبيعية.. وقدراتها البشرية.. عشان تخلق مصدر دخل جديد ومهم جداً للبلد.. وده هيساعد في تنويع مصادر العملة الصعبة.. ويقوي الاقتصاد المصري.
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
