في دولة زي مصر تعدادها أكتر من 110 مليون نسمة، وبتعتمد بنسبة 97% على نهر واحد جاي من برّا حدودها، طبيعي أي خبر عن سد زي سد النهضة يخلي القلق يزيد.
واللي حصل خلي الناس تسأل: مصر هتواجه التحدي ده إزاي؟، وهل في خطط لمواجهة أي تداعيات سلبية ممكن تحصل لنا؟.. وإزاي الحكومة هتتصرف؟
مصر بتحتاج حوالي 114 مليار متر مكعب من المياه سنويًا، لكن مواردها لا تتجاوز 60 مليار متر مكعب، النقص ده – أو العجز المائي – بيتقدر بحوالي 54 مليار متر مكعب كل سنة. ده اللي خلى نصيب الفرد ينزل من 2500 متر مكعب سنة 1947، لـحوالي 500 متر مكعب حاليا..
لحد النهارده، القاهرة بتأكد إن حصة مصر من مياه النيل اللي بتوصل لـ 55.5 مليار متر مكعب سنويًا ثابتة ومافيش أي تراجع فيها.
والحكومة بتأكد إن الوضع تحت السيطرة، ومفيش أي تنازل عن نقطة ميه واحدة، ومع التحركات الدبلوماسية مصر مش مستنية الظروف، بالعكس، شغالة على خطط بديلة عملاقة لتأمين كل نقطة ميه.
دلوقتي في تحرك كبير بيحصل في مجال تحلية مياه البحر، أيوه البحر اللي قدامنا بالإضافة لحصتنا من مياه النيل مصدر أمان، لمواجهة أي مخاطر بخصوص العجز المائي.
مصر عندها دلوقتي أكتر من 100 محطة شغالة بطاقة حوالي 1.3 مليون متر مكعب في اليوم، والخطة واضحة: الرقم ده هيوصل لـ 2.7 مليون متر مكعب يوميًا بحلول 2030، ومع الخطة الطويلة المدى، نوصل لـ 10 مليون متر مكعب في اليوم بحلول 2050، يعني من الآخر، البحر هيبقى بنك ميه جديد لمصر.
والأرقام الاستثمارية ضخمة: مصر ضخت ما يقرب من 190 مليار جنيه في مشروعات إعادة الاستخدام والتحلية لحد دلوقتي.
كمان، شغالة على توطين صناعة المكونات عشان تخفض تكلفة إنشاء المحطات وتوفر عمله صعبة: عالميًا المتر بيكلف حوالي 1200 دولار، في مصر التكلفة نزلت لـ950 – 980 دولار بفضل المكوّن المحلي.
مش بس كده… في مشروع قومي لإعادة استخدام المياه المعالجة، الميه مش هتترمي هتتفلتر وتتعالج وتتوزع تاني للزراعة والمشاريع الكبرى.
والهدف لحد 2030 هو نوفر 5 مليار متر مكعب سنويًا من المياه، ودي أرقام ضخمة وبتسد فجوة كبيرة، وعندنا محطات عملاقة زي محطة المحسمة بالإسماعيلية بطاقة مليون متر مكعب يوميًا، ومحطة بحر البقر بطاقة 5 ملايين متر معكب يوميًا، ومحطة الحمام في مطروح بطاقة 7.5 مليون متر معكب يوميًا.
باختصار… الوضع في النيل لسه مستقر، بس مصر ماشيه بخطة أمان مائي واضحة: تحلية مياه البحر، إعادة استخدام المياه، وتوسيع الزراعة الحديثة، والهدف الكبير؟ نوصل لـ 10 مليار متر مكعب سنويًا بحلول 2030.
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
