كشف خالد الجوادي المترجم السابق للسويسري مارسيل كولر المدير الفني السابق للنادي الأهلي، كواليس الفوز ببطولة دوري أبطال إفريقيا 2023.
تصريحات خالد الجوادي
قال خالد الجوادي: “بعد الهزيمة 5-2 ضد صن داونز في جنوب إفريقيا، لحسن حظنا كان عندنا ماتش في الكاميرون ضد القطن بعدها، لقينا نفسنا في معسكر إعداد جديد في بلد منعزلة”.
وتابع عبر بودكاست الإيجيبشين ليج: “كولر بعد ما اتكلم مع اللاعيبة وبدأ يفوقهم، قالي عايزين نعمل حاجة مختلفة ومجنونة وعايز جرأة”.
وأضاف: “إحنا هناخد اللاعيبة دول نروح بيهم بارك، قولتله مش صعبة شوية، احنا مغلوبين 5 ومش هنكافئهم، قالي مش مكافأة اللاعيبة دول محتاجين يخرجوا من المود ويحسوا انهم فرقة واحدة ومع بعض”.
وواصل: “واتكلم معاهم قالهم احنا على الحلوة والمرة ودي فكرة الفريق، وأنتوا أمام اختبار أنتوا فرقة أصلا ولا لأ، لو هتلوموا بعض هتنهاروا، ومش هتبقوا فرقة واعتبروا الموسم خلص، ولو بقيتوا فرقة واحدة، حتى أحمد ابو الوفا الطبيب النفسي رحب بالفكرة وقال هتبقى مفتاح الفوز بالبطولة دي”.
سر بطولة إفريقيا 2023
وأكمل: “كلمت كابتن سيد قالي أنت اتجننت، ده أنا وأنت كدة هنمشي قبل ما نرجع مصر وهنرجع مشي، حاولت أبيعله الفكرة وكان رافض وقولتله هناخد تعهد من اللاعيبة إن الموضوع ده ميوصلش للإعلام، وكله إلتزم”.
وزاد: “اللاعيبة حسوا إن الراجل بيحارب عشانهم، وكانت ساعة واحدة بس، ولما روحنا ورجعنا لقيت اللاعيبة بقوا ناس تانيين وكل الإحباط والاكتئاب راح”.
وذكر: “واحنا راجعين قالوا هنحارب عشان الراجل والفرقة دي، والنادي خد مغامرة كبيرة عشاننا، وإحنا هنعمل عشان النادي ده أي حاجة، وده اللي كان كولر عاوزه، واللاعيبة اتحولوا تحول غير طبيعي”.
وأشار: “قولت لواحد من بتوع الأمن في جنوب إفريقيا، أشوفك في النهائي بس ياريت أنتوا تيجوا بس، طاهر محمد طاهر قالي إيه الثقة دي، قلتله والله العظيم لو كسبنا القطن هنلعب نهائي”.
وأتم الجوادي حديثه: “بدأت أقول للعيبة كده، لإن كولر خلاني أصدق الفكرة دي، أننا لو كسبنا القطن هنلعب نهائي، وكسبنا القطن 4 وعملنا ماتش كبير، وكله بسبب مدرب أسمه كولر مؤمن بفريقه وبأفكاره الجديدة، وقدر ينقل اللعيبة في زمن قليل من الإحباط والاكتئاب، لفريق بينتفض ومؤمن بحظوظه”.
