منصات بانكير قدمت النهاردة عدد من التقارير والتحليلات الخاصة في الشأن الاقتصادي والمالي المصري، البداية بتقرير عن انخفاض مترقب لسعر صرف الدولار بالبنك المركزي.
قال التقرير، إنه فيه انخفاض مترقب لسعر صرف الدولار بالبنك المركزي، وده بعد لأن البيانات الاقتصادية الأمريكية الأخيرة بتأكد أن في تباطؤ في سوق العمل، وتقرير الوظائف الشهري أكد أن في زيادة أقل من المتوقعة في عدد الوظائف، وده عزز التوقعات اللي بتأكد أن البنك الفيدرالي هيتجه إلى خفض سعر الفائدة في اجتماعاته اللي جاية، والتوقعات الموجودة حاليا أنه هيكون في خفض هيروح ما بين 25 الي 50 نقطة أساس لاجتماعات سبتمبر وديسمبر.
وأكد التقرير، أن أي خفض لأسعار الفائدة دائما بتأدي إلى ضعف قوة الدولار عالميا، خصوصا لأن عوائد الاستثمار بالدولار بتقل، وده بيدفع المستثمرين للاتجاه إلى عملات وأسواق تانية يكون عوائدها أعلي، والدولار بدأ فعليا يظهر ضعف قدام سلة العملات العالمية، وده اللي انعكس علي الأسواق الناشئة والنامية زي مصر.
وأوضح تقرير بانكير، أن كل التوقعات بتأكد أنه في حالة استمرار النمو الاقتصادي، فسعر الدولار هيواصل الانخفاض بنسب أكبر من كده بكتير، خصوصا أن سعر صرف الجنيه المصري متسعر بأقل من قيمته الحقيقية بما يتراوح من 10 لـ 15% من قيمته الحقيقية، والقيمة العادلة للدولار حاليا المفروض تترواح ما 45 إلى 47 جنيه، وفي حالة صدور قرار جديد من البنك الفيدرالي الأمريكي بخفض الفائدة، فسعر صرف الدولار الأمريكي هينخفض لـ 48 أو 49 جنيه بالكتير.
منصات بانكير قدمت تقرير مختلف النهاردة عن خطة مصر لدخول ترتيب أعلى 10 دول في صادرات الذهب.
كشف التقرير، أن اللي بتعمله مصر في قطاع الذهب يعتبر معجزة، خصوصا أن القطاع تحول لواحد من أهم مصادر الدخل الدولاري لمصر من الخارج، وحاليا صادرات مصر من المعدن الأصفر بقت بتوصل لعدد كبير من دول العالم، وبقي عندنا مشغولات ذهبية عليها طلب بالاسم، وده واحدة من الخطط اللي شغالة عليها الدولة لتحويل مصر لمركز إقليمي في صناعة الذهب.
وأكد التقرير، أنه في النص الأول من 2025، صادرات مصر من الذهب والمشغولات ارتفعت بنسبة 194%، وسجلت ما يقارب 3.93 مليار دولار مقابل 1.34 مليار دولار في نفس الفترة من 2024، خصوصا أن معدلات الزيادة في صادرات مصر من الذهب والمشغولات في 2024 وصلت لـ75%، وسجلت 3.26 مليار دولار.. كمان مصر حاليا عندها خطط وهدف أنها تتحول إلي مركز إقليمي لصناعة الذهب، وده هيحصل من خلال تطوير صناعة وتصاميم المشغولات الذهبية ورفع جودة المنتج المصري لمنافسة المعايير العالمية، ده غير الخطوة اللي الحكومة بتستعد لها حاليا لإنشاء مدينة الذهب بالعاصمة الإدارية الجديدة واللي هتضم ورش فنية وتعليمية، بهدف بناء منظومة متكاملة لصناعة المشغولات الذهبية.
وأشار التقرير إلى أن التوسع المصري في صناعة الذهب استهدف كمان دخول وتوقيع شراكات دولية واستثمارية، واللي بيتزامن مع خطة مصر لإطلاق مشروع دمغ الذهب بالليزر، واللي هيكون واحدة من النقط المهمة في خطة مصر للتحول الي مركز إقليمي لصناعة الذهب، وحاليا مصر بتستهدف الدخول ضمن أكبر 10 دول مصدرة للمشغولات الذهبية عالميا في 2027.
وحدة أبحاث بانكير قدمت تقرير خاص النهاردة عن أسباب ارتفاع أسعار الذهب في مصر.
أكد تقرير بانكير، أن أسعار الذهب في مصر مرتبطة بالسعر العالمي للمعدن الأصفر، خصوصا أن سعر الأوقية عالميا تجاوز 3500 دولار خلال الأيام اللي فاتت، وده دفع أسعار الذهب في السوق المصري للارتفاع، وده بسبب ان الذهب بيعد ملاذ آمن في ظل تصاعد التوترات الجيوسياسية والقلق بشأن الاقتصاد العالمي، وده اللي خلي المستثمرين حاليا بيفضلوا الاستثمارات في المعدن الأصفر بسبب أسعاره المستقرة.
وأضاف التقرير، أن الزيادات الكبيرة اللي حصلت في أسعار العالمي للذهب انعكست على سعر الذهب في مصر، واللي حقق مكاسب كبيرة للمستثمرين فيه، ده غير أن السوق المحلي في مصر شهد مؤخرا قرار من البنك المركزي بخفض أسعار الفائدة وده خلي في اقبال اكبر من المستثمرين علي شراء الذهب، ده غير الانخفاض اللي موجود اصلا في سعر صرف الدولار الأمريكي والتحسن الكبير اللي حصل في سعر صرف الجنية المصري.
وكشف التقرير، أن من أسباب زيادة أسعار الذهب، هو أن العالم كله حاليا بيمر بحالة كبيرة من الركود وتقلبات في السوق العالمي، وده خلي في شعور عند المستهلكين للتأمين المالي ده عزز من الطلب العالمي علي الأسعار وكان دور كبير في الارتفاعات الكبيرة اللي حصلت في أسعار المعدن الأصفر.
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
