يا ترى الدولار رايح على فين؟ هل هيفضل سعره ينزل الفترة الجاية ولا ممكن يعمل ريمونتادا؟ وهل الجنية هيفضل يواصل ارتفاعه؟ وايه الحاجات اللى بتراهن عليها الحكومة للسيطرة على سوق الصرف وضمان تدفق موارد دولارية.
من فترة قريبة .. الكل كان بيحلم إن الدولار سعره يوصل لأرقام معقولة.. والحلم ده بدأ يتحقق.. بس مش فجأة.. لأ.. ده نتيجة مجهودات وخطوات اقتصادية كتير.. كانت بتحصل ورا الكواليس.
أول حاجة لازم نعرفها.. إن سعر الدولار في مصر.. مش مجرد رقم بيتغير كل يوم.. لأ.. ده انعكاس لحالة العرض والطلب. طول ما فيه طلب كبير على الدولار.. وما فيش منه كتير في السوق.. سعره بيعلى. والعكس صحيح.
طيب.. إيه اللي حصل في الفترة الأخيرة وخلى فيه دولار متوفر أكتر في السوق؟ الإجابة.. في ثلاث كلمات.. "صفقة رأس الحكمة".
الصفقة دي.. مش مجرد اتفاق بيع أراضي.. لأ.. دي بوابة كبيرة جداً.. دخل منها مليارات الدولارات لخزينة الدولة. والمبلغ ده.. كان بمثابة قبلة الحياة للسوق المصري.
أول ما الفلوس دي بدأت تدخل.. البنك المركزي حس إن عنده قوة.. وبقى قادر يسيطر على سعر الصرف.. وقرر إنه يعمل خطوة جريئة جداً.. وهي "التعويم".
التعويم اللي فات.. كان مختلف عن أي تعويم قبله. لإن المرة دي.. البنك المركزي كان عنده "حصالة" مليانة دولارات.. يقدر يستخدمها علشان يتحكم في السوق.. ويمنع أي ارتفاعات غير مبررة.
وهنا.. الدولار بدأ سعره يقل.. والجنيه بدأ يسترد قوته. بس هل الموضوع هيفضل كده على طول؟ هل الدولار هيواصل النزول.. والجنيه هيواصل الصعود؟
الإجابة.. آه. بس بشرط.. الشرط ده.. هو إن الحكومة تنجح في إنها تزود مصادرها من العملة الصعبة.. وما تعتمدش بس على صفقة رأس الحكمة.
طب إيه الحاجات اللي الحكومة بتراهن عليها الفترة الجاية علشان تجيب دولار؟
فيه 3 حاجات أساسية
أولها السياحة .. مصر عندها مقومات سياحية لا حصر لها.. لو تم استغلالها صح.. ممكن تجيب مليارات الدولارات في السنة. الحكومة بتراهن على زيادة أعداد السائحين.. خصوصاً بعد تحسن الأوضاع الاقتصادية.
تانى حاجة.. تحويلات المصريين في الخارج.. بعد توحيد سعر الصرف والقضاء على السوق السوداء.. المصريين في الخارج هيكون عندهم حافز كبير إنهم يحولوا فلوسهم من الطرق الرسمية.. وده هيجيب دولار كتير للبنوك المصرية.
ةفيه كمان الاستثمارات الأجنبية المباشرة.. المستثمر الأجنبي.. أول حاجة بيبص عليها قبل ما يستثمر في أي بلد.. هي استقرار سعر الصرف.. والقضاء على السوق السوداء.. اللي بتخسره كتير. لما يشوف إن الدولار سعره مستقر.. هيجي يستثمر في مصر وهو مرتاح.
المرحلة الجاية.. هتكون مرحلة حاسمة للاقتصاد المصري. لو الحكومة نجحت في رهاناتها دي.. هنشوف فعلاً نهاية أزمة الدولار. لكن لو فشلت.. ممكن الأمور ترجع تاني لنقطة الصفر.
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
