ليه مؤسسات دولية كبيرة زي بلومبرج وصندوق النقد وموديز أشادت بأداء الجنيه المصري من بداية السنة، وإيه معنى الاشادة دي بالنسبة لينا كمواطنين، وهل فعلا هتساهم في دعم الجنيه على حساب الدولار الأيام الجاية؟
في الحقيقة، في مؤسسات دولية زي بلومبرج وصندوق النقد وموديز أشادت بأداء الجنيه المصري من بداية السنة، وطبعا الاشادة دي مش جاية من فراغ، لأنها انعكاس مباشر لنجاح السياسات الإصلاحية اللي اتبنتها الدولة في الفترة الأخيرة، واللي قدرت تخلّي الجنيه يتحسن قدام الدولار بنسبة حوالي 5% من شهر يناير لحد نص أغسطس.
والكلام ده معناه إن سوق الصرف بقى أكثر استقرار، والفجوة مع السوق الموازية اتقلصت بشكل واضح.
الأهم من كده، إن الإصلاحات دي مش بس أثرت جوه مصر، لكن كمان انعكست بره، وده باين في نظرة المستثمرين اللي بقوا شايفين إن الاقتصاد المصري عنده مرونة وقدرة على مواجهة الصدمات، وده بيترجم في تدفقات استثمارية جديدة سواء بشكل مباشر أو غير مباشر.
ومن المؤشرات المهمة كمان، ارتفاع تحويلات المصريين بالخارج بنسبة 60% في 5 شهور بس، عشان توصل ل 15.8 مليار دولار، وده رقم ضخم، غير إن الصادرات زادت بأكتر من 20%، والإيرادات السياحية كمان طلعت فوق 21%، وطبعا الأرقام دي كلها بتقول إن موارد العملة الصعبة بقت متنوعة ومش معتمدة على قطاع واحد.
فوق كل ده، الاحتياطي الأجنبي ارتفع ل49 مليار دولار في يوليو 2025، مقارنة ب 46.5 مليار دولار السنة اللي فاتت. وده يعتبر درع أمان يخلي الدولة عندها قدرة تواجه أي أزمة أو ضغط خارجي يحصل فجأة.
والكلام ده معناه إن استقرار الجنيه مش بس خبر اقتصادي، لكنه كمان له تأثير مباشر على حياتنا اليومية، لأن استقرار العملة بيقلل الضغوط على الأسعار ويخلي التضخم ينزل تدريجيا وده مع الوقت يخفف العبء على المستهلك.
وكمان، لما المستثمرين الأجانب يحسوا إن الاقتصاد المصري آمن، فده بيشجعهم يدخلوا باستثمارات جديدة، واللي بيترجم لفرص عمل أكتر،ذ وإنتاج أعلى، وبالتالي دخل أحسن للمواطن.
يعني إشادة المؤسسات الدولية في الآخر مش بس شهادة شرف لمصر، لكنها خطوة لقدام في تحسين مستوى المعيشة، وفي الآخر نقدر نقول إن إشادة المؤسسات الدولية دي رسالة طمأنة قوية للعالم كله إن الاقتصاد المصري ماشي في طريق الإصلاح بجد، وإن استقرار الجنيه مش مجرد قرار إداري لكنه نتيجة سياسات واقعية بتتنفذ على الأرض، واللي جاي ممكن يكون أفضل لو الإصلاحات دي استمرت بنفس الوتيرة.
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
