ناشد مواطن يدعي مصطفي منير، وزارة الداخلية بالقبض على سائق نقل حاول خطف زوجته وإخواتها وحماته.
وقال المواطن، عبر صفحته على موقع التواصل الاجتماعي فيسبوك، " بلاغ رسمي إلى وزارة الدّاخلية والمسؤولين في مصر. إمبارح في بلطجية حاولوا يخطفوا حماتي والدة شروق وجدة تميم ابني، وبناتها إللي هما إخوات شروق، وكمان زوجة أخو شروق، وكل ده وهما راكبين العربية وخارجين كعائلة عادي. إللي حصل إن أحمد أخو شروق مراتي، كان راكب عربيتهم ومعاه والدته ومراته وإخواته البنات، فلقى عربية نقل أرقامها (ب ق ل 5923) بتقرب منه وبتشاورله ينزّل إزاز عربيته، أحمد افتكر في حاجة في العربية، ففتح الإزاز، لقاهم بيسألوه بمنتهى الوساخة (بكام الليلة مع النسوان دي؟)".
وتابع،" فأحمد -الراجل الوحيد في الموقف- قفل إزاز عربيته ومشي حمايةً لحريم بيته، فبدأ البلطجية إللي راكبين العربية الحمرا دول مطاردة أحمد وعربيته وخبطوه، وفضلوا يقولوا (هات النسوان دي بنقولك! هناخدهم يعني هناخدهم)، لغاية ما وصلوا عند مطب والعربية الحمرا إللي بتطارد أحمد وقفت ونزل منها اتنين بلطجية وركبوا ميكروباص كان تبعهم وواقف مستنيهم، الميكروباص رقمه (ر ط د 2384)، وكلهم جريوا ورا أحمد، عشان يخطفوا والدة شروق وإخواتها البنات وزوجة أخو شروق. طبعا فضلوا يطاردوه وخبطوه كذا مرة والعربية اتدشملت وتوازن العربية اختل فوقفت عند مجزر آلي قبل المعهد الديني على طريق بلبيس، وهناك ربنا ستر ورجالة خرجوا من المجزر يشوفوا في إيه، فزي ما حضراتكم شايفين اتلموا عليهم وفضلوا يقولوا: "آه.. سلموا الناس دول لينا، دول سرقوا موبايل مننا!".
واستطرد،" الأوساخ بيتهموهم بسرقة عشان يخطفوهم! طبعا شباب المجزر فهموا وشافوا بنات ناس وناس محترمة والناحية التانية بلطجية وشخير وضرب، تخيل إنهم ضربوا أحمد وضربوا حماتي!!!! ضربوا ست قد والدتهم بتدافع عن ابنها!! فشباب المجزر اتدخلوا وطبعا قامت عركة وهربوا البلطجية. أهل شروق عملوا محضر جنح مجلس بلبيس رقمه19417..أحمد اتعور جامد في رقبته، كانوا عايزين يدبحوه!!!! وماة شروق متعورة في وشها!!! يعني بتدافع عن حريم بيتك فيبقى جزاءك الدبح كل ده حصل في الشرقية، تحديدا من بعد العباسة لغاية السعادات على طريق أبو حمّاد/ البلبيس".
وقال،" حسبي الله ونعم الوكيل، هي وصلت لمحاولة خطف بنات وهما راكبين عربيات في وضوح النهار مع أهاليهم!!! أنا كاتب البوست ده كبلاغ رسمي لوزارة الداخلية، وأتمنى من كل قلبي، البلطجية دول يتجابوا.
أنا غضبان جدا يا مصر، بجد ما ينفعش كده والله يا مصر.
إخلاء مسؤولية إن موقع عاجل نيوز يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
