مصر خلاص حطت خطة علشان تتخلص من أزمة زيادة استنزاف الدولار في عمليات استيراد الغاز الطبيعي والمازوت اللي محتاجينهم لتشغيل محطات توليد الكهرباء.. ياتري اية اللي بتعمله الحكومة علشان تتخلص من صداع استيراد المواد البترولية.. وهنوفر كام مليار سنويا من الخطة دي.
الحكومة عندها أزمة كبيرة وتحديدا في قطاع الكهرباء واللي بيستنزف نسبة كبيرة من المخصصات المالية وده بسبب الاعتماد علي نسبة كبيرة من المواد البترولية المطلوبة لتشغيل محطات توليد الكهرباء خصوصا الغاز الطبيعي والمازوت علي عمليات الاستيراد من الخارج، وحاليا وصلت ل 30 مليار دولار من بداية 2025، خصوصا أن مصر بتستورد تقريبا 40% من الاستهلاك المحلي.
الاستنزاف الدولاري الكبير اللي الحكومة بتدفعه علشان تأمن التغذية الكهربائية للاسف كبير جدا ومرهق لفاتورة مصر الاستيرادية واللي الحكومة بتعمل كل الممكن علشان توفر منها ويكون الاستيراد في مناطق محدودة جدا، ومقتصر علي السلع المهمة والحاجات الإستراتيجية.
طيب اية اللي بتعمله الدولة علشان توفر مليارات استيراد الغاز الطبيعي والمازوت ؟.
واحد من أهداف الحكومة في الوقت الحالي هو وقف الاستيراد من الخارج بكل أشكاله وعلشان الحكومة تخلص من الازمة دي اتجهنا لزيادة الاعتماد علي الطاقات الجديدة والمتجددة وده بيحصل عن طريق التوسع في بناء محطات الطاقة الشمسية وطاقة الرياح في المناطق المستهدفة خصوصا في أسوان بالنسبة لمحطات الطاقة الشمسية وخليج السويس بالنسبة لمحطات طاقة الرياح.
الجهود اللي قامت بيها الحكومة علي مدار الفترة اللي فاتت كان نتيجها أن الحكومة أدخلت أكثر من 2000 ميجاوات جديدة علي الشبكة الموحدة للكهرباء ومستهدف كمان دخول اكثر من 800 ميجاوات جديدة علي الشبكة خلال الفترة اللي جاية، والطاقات دي وفرت لمصر أكثر من 500 مليون دولار شهريا وبقت بمثل نسبة 12% من الطاقة المستهلكة.
في الوقت الحالي الحكومة شغالة علي خطة جديدة تماما وهو مشروعات تخزين الطاقة، وحاليا الحكومة بتنفذ محطتىن لتخزين الطاقة بقدرة 1500 ميجاوات ساعة كأول مشروع لتخزين الطاقة بنظام المحطات المنفصلة على الشبكة الكهربائية الموحدة في محافظات أسوان والبحر الأحمر.
التوجه الجديد لادخال نظام بطاريات التخزين المنفصلين جاي بعد ما الحكومة نجحت فية إدخال أنظمة تخزين الطاقة بواسطة البطاريات لأول مرة فى مصر في الشهور اللي فاتت، وحاليا عندنا محطة فى أسوان تابعة لشركة اميا باور بتضيف للشبكة الموحدة للكهرباء قدرة 300 ميجاوات ساعة تخزين، والحكومة مستمرة في التوسع فى إقامة محطات التخزين لدعم الشبكة الكهربائية وزيادة قدرتها لتأمين التغذية الكهربائية المطلوبة للمواطنين.
مصر حاليا عندها خطة للوصول بحجم الطاقات الجديدة والمتجددة علي الشبكة الموحدة للكهرباء ل 42% من حجم الاستهلاك المحلي للطاقة في 2030 ومتسهدف نوصل بحجم الطاقة المستهلكة ل65% علي الشبكة الموحدة في 2040، ودي هتوفر لمصر مليارات كبيرة كانت بتصرفا لاستيراد الغاز الطبيعي والمازوت لتشغيل محطات توليد الكهرباء.
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
