منصات بانكير قدمت النهاردة عدد من التقارير والتحليلات الخاصة في الشأن الاقتصادي والمالي المصري.. والبداية بتقرير عن تجهيز مصر أكبر مركز محوري لتخزين وتداول البترول الخام.
قال التقرير، إن مصر هتبقى مركز عالمي لتخزين وتداول البترول زي أكبر مواني العالم، وده بعد زيارة المهندس كريم بدوي وزير البترول لميناء الحمراء البترولي في العلمين الجديدة، عشان يتابع بعينه الشغل والتوسعات اللي شغالة هناك، الميناء ده بتديره شركة "ويبكو"، وبيتم تطويره عشان يتحول لمركز لوجيستي ضخم لتخزين وتداول البترول الخام وكمان المنتجات البترولية، وكل ده على ساحل البحر المتوسط.
وأضاف التقرير، أن الوزير ما اكتفاش بالجولة، لكن كمان عمل اجتماع كبير ضم المهندس صلاح عبدالكريم رئيس الهيئة العامة للبترول، وعدد من كبار قيادات القطاع، وكمان كان موجود أحمد عادل، مستشار حكومة إمارة الفجيرة بالإمارات، ومعاه مسئولين من مؤسسة الفجيرة للنفط والغاز.
وكشف تقرير بانكير، أن الوزير شدد على إن لازم نسرع الخطوات التنفيذية لمشروع المركز اللوجيستي ده، واللي هيكون شبه تجربة ميناء الفجيرة اللي يعتبر من أكبر المراكز العالمية في تجارة البترول، وأكد أن لازم يكون فيه جدول زمني واضح لكل مرحلة من المشروع، مع الاستفادة من خبرات ميناء الفجيرة في الإدارة والتشغيل، وكمان تطبيق أعلى معايير السلامة والجودة.. كمان شركة "ويبكو" شغالة على إنشاء 4 مستودعات جديدة لتخزين الخام، عشان السعة التخزينية تعلى من 2.8 مليون برميل لـ 5.3 مليون برميل.
منصات بانكير قدمت تقرير مختلف النهاردة عن موعد اجتماع البنك المركزي المقبل لحسم مصير الفايدة
أكد تقرير بانكير، أن لجنة السياسة النقدية بالبنك المركزي المصري هتجتمع يوم 28 أغسطس الحالي، عشان تحسم مصير أسعار الفايدة للقترة الجاية.. لأن الاجتماع ده هو خامس اجتماع السنة دي للجنة السياسة النقدية، بعد ما في يوليو اللي فات قررت انها تثبت أسعار الفايدة بعد فترة من تطبيق سياسة التخفيض، والتثبيت كان بواقع سعر الإيداع لليلة واحدة عند 24%، والإقراض لليلة واحدة عند 25%، والعملية الرئيسية للبنك عند 24.5%، وكمان الإئتمان والخصم ثابت برضه عند 24.5%.
وأضاف التقرير، أن الاجتماع الجاي مش بس مهم عشان الفايدة، لكن كمان لأنه جاى في وقت السوق فيه تغييرات كبيرة، من تدفقات أموال ساخنة لحد حدوث تحركات في سعر الدولار، وكمان تقارير التضخم اللي بترسم صورة واضحة عن اتجاه الأسعار فى الشهور الجاية.. كمان البنك المركزي لسه عنده 3 اجتماعات بعد اجتماع أغسطس، وهي يوم الخميس 2 أكتوبر وكمان 20 نوفمبر و25 ديسمبر، يعني أي قرار هيتاخد الشهر ده اكيد هياثر بشكل مباشر على بقية اجتماعات السنة.
واستعرض تقرير بانكير، السيناريوهات المتوقعة للبنك المركزي، لأن فيه ناس شايفة إن البنك المركزي هيكمل سياسة التثبيت عشان يراقب أثر قراراته اللي فاتت ويشوف معدلات التضخم هتمشى إزاي، وفي ناس تانية بتقول ممكن يخفض الفايدة شوية علشان يشجع الاستثمار خاصة مع حدوث تحسن نسبي في توفر العملة الصعبة.. لكن لو حصل خفض للفايدة، فده بيشجع الشركات والأفراد ياخدوا قروض أكتر عشان يشتغلوا وبستثمروا، وده ممكن يحرك السوق بس في المقابل العائد على الشهادات هيقل والمستثمرين ممكن يدوروا على فرص تانية خارج البنوك.
وحدة أبحاث بانكير قدمت تقرير خاص النهاردة عن سر زيادة صادرات الصناعات الغذائية خلال النصف الأول من 2025
أكد التقرير، أن الحكاية بدأت لما المجلس التصديري للصناعات الغذائية أعلن إن القطاع حقق نمو 6% مقارنة بنفس الفترة من 2024، يعني زودنا حوالى 182 مليون دولار زيادة، وده أعلى رقم صادرات نوصل له في نص سنة من ساعة ما بدأنا نسجل البيانات دي
وأضاف التقرير، أن أكتر الأسواق اللي اشترت مننا، فالدول العربية كانت فى الصدارة ب 1.577 مليار دولار يعني حوالي نص الصادرات تقريبا، ورغم كده سجلوا تراجع بسيط بنسبة 4%، وجه بعدها الاتحاد الأوروبي بـ715 مليون دولار بزيادة 2%، وبعدين أفريقيا غير العربية بـ 249 مليون دولار بزيادة 9%، والمفاجآة بقى ان أمريكا لوحدها اشترت ب 230 مليون دولار، وده عمل نمو 47% وبيعتبر طفرة كبيرة.. ولو جينا نشوف أهم الدول، فالسعودية كانت الأولى بـ258 مليون دولار، بعدها أمريكا بـ230 مليون، وبعدين السودان وليبيا وهولندا والأردن والإمارات والجزاير بعدين العراق وفي الاخر إيطاليا.
وأوضح تقرير بانكير، أن السلع اللي عملت فرق، فالمفاجأة إن الفراولة المجمدة كانت البطل بصادرات وصلت لـ442 مليون دولار بزيادة بنسبة 75%، بعدها مركزات صناعة الكولا وزيوت الطعام بعدين السكر والدقيق.. ونقدر نقول، ان النجاح ده وراه أكتر من سبب، أهمهم تحسين جودة المنتج المصري والالتزام بالمعايير العالمية اللي بتخلي السلع دي تنافس في أسواق كبيرة زي أوروبا وأمريكا، وكمان في حملات ترويجية ومعارض دولية ساعدت في جذب مشترين جداد.
وأشار التقرير إلى أن فيه توجه واضح لاختراق أسواق غير تقليدية زي الصين ولبنان وألمانيا الليى حققوا أعلى معدلات نمو في استيراد المنتجات المصرية خلال الفترة دي، وده معناه إن الخطة مش بس الحفاظ على العملاء الحاليين لكن كمان فتح أبواب جديدة.
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
