يا ترى إمتى الوقت الصح اللي ممكن البنك المركزي يبدأ فيه خفض أسعار الفايدة، وايه اللي موقفه لحد دلوقتي رغم إن التضخم نزل؟
بنك "جي بي مورجان" طلع تصريحات عن الاقتصاد المصري وأسعار الفايدة، وأكد ان البنك المركزي مش هيخفض الفايدة في الاجتماع الجاي قي شهر أغسطس الحالي، رغم إن التضخم بدأ يهدى شوية.
طب ليه؟
عشان في أسباب تانية لسه بتخلي البنك المركزي ياخد حذره، زى مثلا الضرايب الجديدة اللي اتفرضت على السجاير وبعض القطاعات التانية، ودي ممكن تزود التضخم تاني في يوليو.
كمان، جي بي مورجان، بيتوقع إن أول خفض فعلي للفايدة هيبدأ في أكتوبر الجاي وبنسبة 1%، وبعدها هيحصل خفض تاني في نوفمبر، وكمان واحد في ديسمبر، يعني البنك المركزي بيمشي على مهل وبيستنى يشوف تأثير كل خطوة قبل ما يتحرك.
وكان، البنك المركزي في آخر اجتماع، قرر يثبت الفايدة وفضل سعر الإيداع 24%، والإقراض 25% والعملية الرئيسية عند 24.5% وسعر الائتمان والخصم كمان 24.5%. وده كان متوقع، لإن في حالة عدم يقين عالمية من أول الحروب التجارية، لحد السياسات النقدية اللي ماشية بحذر في الدول الكبرى، وكمان تقلبات أسعار النفط والسلع.
بس عندما في مصر، الوضع بقى أحسن شوية، والاقتصاد المصري بدأ يتعافى، والنمو في الربع التاني من 2025 فضل زي الربع الأول عند 4.8%، كمان الفجوة بين الإنتاج الفعلي والطاقة القصوى بتقفل تدريجيا وده معناه إن الضغط على الأسعار من ناحية الطلب بيقل.
أما التضخم، ففصل ينزل هو كمان، وده بسبب انخفاض أسعار الأكل واستقرار السلع التانية، بس رغم ده كله لجنة السياسة النقدية فضلت تستنى شوية قبل ما تبدأ في التيسير النقدي، لإنها عايزة تسوف تأثير القوانين الجديدة والضراثب اللي اتفرضت، وكمان مش عايزو تاخد قرارات سريعة ترجع التضخم يزيد تاني.
واللجنة قالت إنها هتفضل تتابع البيانات أول بأول ومش هتتحرك غير لما تكون الأمور واضحة، لأن هدفهم التضخم ينزل بنهاية سنة 2026.
يعني الخلاصة، هي ان البنك المركزي بيحاول يوازن بين إنه يسيب الاقتصاد ياخد نفسه وفي نفس الوقت مايخفضش الفايدة بدري، وأقرب توقيت متوقع لخفض الفايدة، هيكون في أكتوبر، بس ده كله بيعتمد على تطورات الأسعار والسياسات الجديدة.
فلو مستني الفايدة تنزل عشان تاخد قرض أو تستثمر، فركز كويس على اجتماعات المركزي الجاية، واللي جاي هيحدد كتير.
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
