يا ترى إيه اللي بيحصل في سوق الفضة، ولبه المستثمرين رجعوا يركزوا عليها تاني. وهل فعلا الفضة قربت تكسر أعلى مستوياتها من 2011؟
في الساعات الأخيرة، الفضة بتثبت مكانها وسعرها بيستقر عند مستويات عالية جدًا وقرب أعلى نقطة ليها من أكتر من 13 سنة.
في السوق العالمي، سعر أوقية الفضة دلوقتي وصل حوالى 37.8 دولار، وفي السوق المحلي جرام الفضة عيار 800 بقى بحوالي 52 جنيه، انا عيار 925 فسجل 60 جنيه، والجنيه الفضة بيوصل ل480 جنيه، وطبعا ده كله وسط حالة ترقب شديدة في الأسواق العالمية خاصة مع اقتراب قرارات مهمة من البنك الفيدرالي الأمريكي.
طيب إيه اللي خلا الفضة تلمع بالشكل ده؟
من أول السنة، الفضة حققت مكاسب بأكتر من 30%، وده رقم مش قليل خالص، ده بيخليها ترجع لمشهد الاستثمار كمخزن آمن للقيمة، ةاللي دعم الفضة كمان هو توقعات قوية إن الفيدرالي الأمريكي ممكن يخفض الفايدة في سبتمبر، وده بيخلى المستثمرين يبعدوا عن الدولار ويروحوا للفضة.
والجميل، ان مؤشر الدهب للفضة نزل ل 89، وده معناه إن الفضة أدائها أقوى من الدهب الفترة دي، بس في ارتباك سياسي حوالين التعيينات الجديدة في مجلس الفيدرالي الأمريكي، وترامب لسه هيعلن قريب مين اللي هيقود السياسة النقدية هناك والموضوع ده بيخلي السوق في حالة ترقب شديد.
وفي نفس الوقت، عوايد السندات الأمريكية بدأت ترتفع شوية وده خلا ناس تانية تبيع الفضة لجني الأرباح مؤقتا، فالسوق بقى ما بين دعم قوي وقلق سياسي واقتصادي.
ومن ناحية تانية، الطلب الصناعي على الفضة مش بيهزر، خاصة في مجالات زي الإلكترونيات والطاقة الشمسية اللي لوحدها بتمثل حوالي 15% من الطلب العالمي على الفضة، ده غير كمان إن السوق بيعاني من نقص في المعروض، والتكلفة بتاعة اقتراض الفضة وصلت لأكتر من 6% في لندن. وده بيدي إشارة إن فيه ندرة في الكميات المعروضة، وبيرفع السعر أكتر.
كمان، في تقرير من "بيرث مينت" الأسترالية كشف إن مبيعات العملات الفضية نزلت لأضعف مستوى من 6 شهور، وده معناه إن في شوية برود في الطلب الفردي لكن الزخم العام لسه موجود عالميا والفضة لسه ماشية في طريق الصعود.
والخلاصة، هي ان الفضة رجعت تلمع تاني وممكن تكمل في طريق الصعود لو فعلا الفايدة اتخفضت والدولار فضل ضعيف، بس في نفس الوقت السوق حساس جدا لأي أخبار اقتصادية أو سياسية يعني نقدر نقول ان الفضة ماشية على سلك رفيع. فلو بتفكر تستثمر، تابع التحركات الجاية في أمريكا وقرارات الفيدرالي لإنهم هما اللي هيحددوا اتجاه الفضة في الشهور اللي جاية.
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
